Трамп Тоқаевты Газадағы бейбітшілік кеңесіне шақырды

Бұл туралы ақпаратты президенттің баспасөз-хатшысы Руслан Желдібай мәлімдеді, деп хабарлайды Orda.kz.

Кейбір шетелдік БАҚ өкілдері бұны альтернативті БҰҰ деп те атайды.

«Иә, Президент Қасым-Жомарт Тоқаев әлем көшбасшыларының арасында алғашқылардың бірі болып Бейбітшілік Кеңесінің құрамына кіруге, ал Қазақстанға құрылтайшы мемлекеттердің бірі болуға ресми шақырту алды. Бұған жауап ретінде Мемлекет басшысы АҚШ Президентіне хат жолдап, шынайы ризашылығын білдірді және осы жаңа бірлестікке кіруге келісімін растады» деп жазды Руслан Желдібай. 

Желдібайдың айтуынша, Тоқаев Қазақстанның таяу шығыста берік бейбітшілікке қол жеткізуге, мемлекетаралық сенім мен жаһандық тұрақтылықты нығайтуға қолдан келгенше үлес қосатынын айтты.

Еске сала кетейік, Ресейлік философ және идеолог Александр Дугин Қазақстанды және басқа да посткеңестік елдерді егемендігінен айыруға шақырды. Ол тәуелсіз мемлекеттер дәуірі аяқталды деп мәлімдеп, Мәскеудің бақылауындағы одақ құруды ұсынды.