Трамп тағы да Нобель сыйлығына ұсынылды

АҚШ-тың президенті Дональд Трамп бейбітшілік саласындағы Нобель сыйлығына қайта ұсынылды, деп хабарлайды Orda.kz.

Сенатор Кэти Бритт Fox News арнасындағы Hannity бағдарламасында Дональд Трамптың «бейбітшілік орнатудағы күш-жігерін» жоғары бағалап, оны Нобель сыйлығына лайық деп мәлімдеді. Бұл пікір Трамп Израиль мен Иран арасындағы атысты тоқтату жөнінде келісімге келгенін жариялағаннан кейін айтылды.

«Президент Трамп Нобельдің бейбітшілік сыйлығын алады, бұған еш күмән жоқ! Оның Конго мен Руандада, Пәкістан мен Үндістан арасындағы және енді міне, Таяу Шығыстағы әрекеттеріне назар салыңыз. Ол бұл өңірлерге тұрақтылық пен бейбіт өмір алып келді», – деді сенатор Бритт.

Сонымен қатар, Нобель комитетіне жолданған ресми хатта Трамптың Иранның ядролық амбицияларын тоқтатуға және бұл елдің ядролық қаруға қол жеткізуіне жол бермеуге бағытталған батыл әрекеттері ерекше аталған.

«Президент Трамп осыған дейін мүмкін емес деп саналатын келісімнің жылдам жасалуына ықпал етті. Ол Иранның ядролық ниетін тоқтатып, бұл елдің жойқын қаруға қол жеткізуіне жол бермеу үшін батыл әрі нақты қадамдарға барды» деп жазды конгрессмен Нобель комитетіне жолдаған хатында.