Трамп пен Си Цзиньпин сауда соғысын тоқтатуға уәде берді

АҚШ пен Қытай бірнеше айға созылған шиеленістен кейін диалогты қайта конструктивті арнаға бұруға тырысып жатыр. Екі елдің көшбасшылары тарифтер, стратегиялық ресурстар жөнінде сөйлесіп, бір-бірін қонаққа шақырды, деп хабарлайды Orda.kz.

АҚШ президенті Дональд Трамп ҚХР төрағасы Си Цзиньпинмен телефон арқылы сөйлесті — бұл екі ел арасындағы сауда қатынастары ушыққалы бергі алғашқы байланыс. Әңгіме бір жарым сағатқа созылған. Трамптың айтуынша, ол «өте жақсы әрі нәтижелі» болған. Негізгі назар сауда, тарифтер және АҚШ үшін аса маңызды электроника, автокөлік өндірісі мен қорғаныс саласына қажет сирек кездесетін жер элементтерінің жеткізілуі мәселесіне аударылды.

Екі көшбасшы да мамыр айында қол жеткізілген өзара кедендік алымдарды төмендету туралы келісімді орындайтындарын растады (АҚШ тарапынан – 145%-дан 30%-ға, Қытай тарапынан – 125%-дан 10%-ға дейін төмендету). Бұған дейін Трамп Пекинді стратегиялық шикізат экспорты бойынша прогресс болмағаны үшін келісімді бұзды деп айыптаған. Қазір ол бұл бағытта алға жылжу бар екенін мәлімдеді.

«Сирек кездесетін жер асты қазбаларын өндірудің күрделілігіне қатысты енді сұрақ болмауы тиіс» деп жазды ол Truth Social желісінде. 

Өз кезегінде Си Цзиньпин АҚШ-ты «теріс әрекеттерден бас тартуға», келіссөздерде тепе-теңдікті сақтауға және Тайвань мәселесінде арандатушылыққа бармауға шақырды.

«Қытай-АҚШ қатынастарының алып кемесін қайта дұрыс бағытқа бұру үшін біз тізгінді өз қолымызға алып, дұрыс бағытты белгілеуіміз керек», – деді ол. 

Қытай, атап айтқанда, микрочиптер экспортын шектеуді алып тастауды және маңызды ғылыми мамандықтар бойынша білім алып жүрген студенттердің визаларын кері қайтаруды тоқтатуды талап етті.

Си Цзиньпин Трамп пен АҚШ-тың бірінші ханымын Қытайға шақырды, ал Трамп ҚХР төрағасын Вашингтонға қонаққа шақырды. Жеке кездесу уақыты әзірге белгісіз, бірақ тараптар экономикалық мәселелер бойынша жақын арада келіссөздерді жалғастыруға келісті.

Бұған дейін біз АҚШ пен Қытайдың Женевадағы келіссөздер нәтижесінде сауда соғысын тоқтатып, өзара кедендік алымдарды уақытша төмендеткенін жазған едік. Алайда бірнеше аптадан кейін Пекин мен Вашингтон бірін-бірі келісімді бұзды деп айыптап, бұл екі ел басшыларының кездесу перспективасын күмән тудырған болатын.

2025 жылдың 1 ақпанда АҚШ президенті Дональд Трамп Қытайдан, Канададан және Мексикадан АҚШ-қа импортталатын тауарларға, сондай-ақ Канада энергетикасына баж салығын енгізетінін мәлімдеді.

Қытай тарифтері қазан айында Оттаваның Қытай импортына баж салығын енгізгеніне жауап ретінде қабылданды. Одан кейін Қытайда өндірілген барлық электр көліктеріне 100 пайыз, болат пен алюминий импортына 25 пайыз қосымша салық салынды.

12 сәуірден бастап  Қытай да жауап ретінде АҚШ тауарларына қосымша баж салығын 84 пайыздан 125 пайызға дейін арттырды.