Трамп Қытайдан келетін тауарларға салық салады: Оның Қазақстанға әсері

АҚШ-тың жаңа сайланған президенті Дональд Трамп Қытайдан келетін тауарларға 10%-дық жаңа тариф енгізілетінін мәлімдеді, деп хабарлайды Orda.kz.

Еске сала кетсек, Orda.kz Қазақстан Сенатының төрағасы Мәулен Әшімбаев қоғамды таң қалдырып, Taldau Talks атты жаңа подкастың тұсауын кескені жайлы жазған болатын. Осы бағдарламада АҚШ және Қытай қарым-қатынастарының біздің елге әсері жайлы айтылды.

Трамптың айтуынша, Қытай АҚШ-қа заңсыз заттардың жеткізілуіне қарсы қатаң шаралар қабылдағанша салық салады.

Бұл шешім Қазақстан экономикасына қалай әсер етеді?

Осы сұраққа Ұлттық банк төрағасы Тимур Сүлейменов подкаста жауап берді.

Ол Қытайдағы экономикалық белсенділіктің төмендегенін атап өтіп, АҚШ-тың Қытай тауарларына баж салығын енгізуі Қытай экономикасына қосымша теріс әсер етуі мүмкін екенін ескертті. Оның айтуынша Қазақстан Қытайдың негізгі сауда серіктесі болған соң осы өзгерістер әсер етуі мүмкін.

«Қытайдағы экономикалық белсенділік айтарлықтай төмендеді. Егер Америка Құрама Штаттары Қытай тауарларына маңызды сауда баждарын енгізсе, бұл Қытай экономикасына кері әсер етеді. Қазақстан, көрші мемлекет және ірі сауда серіктесі болған соң бұл өзгерістер бізге де әсер етеді», – деп атап өтті Сүлейменов.