Трамп ЕО мен Мексикадан әкелінетін тауарларға 30% баж салығын енгізбек

АҚШ 1 тамыздан бастап Еуропалық одақ пен Мексикадан жеткізілетін бірқатар тауарларға 30 пайыз көлемінде кедендік баж салығын енгізетінін хабарлады, деп мәлімдейді Orda.kz.

 Бұл туралы Дональд Трамп өзінің Truth Social парақшасында жариялаған ашық хаттарда жазған.

«Еуропалық одақ АҚШ нарығына толық әрі ашық қолжетімділік ұсынады, әйтпесе сіздер енгізетін кез келген кедендік алымдарға қоса, біз 30 пайыздық салықты қолданамыз», — деді АҚШ президенті.

Бұл тарифтер Вашингтонның сауда қатынастарын қайта қарауға бағытталған кең ауқымды бастамасының бір бөлігі. Сәуір айында Трамп 185 елге ең төменгі 10 пайыздық салық енгізетінін мәлімдеп, келіссөздерге үш ай мерзім белгілеген.

Еурокомиссия төрағасы Урсула фон дер Ляйенге жазған хатында Трамп қатаң шаралардан тайынбайтынын білдірді. Ал Брюссель, өз кезегінде, диалогқа басымдық беретінін айтып, келіссөздер сәтсіз аяқталған жағдайда АҚШ-қа қарсы шара қолданатынын ескертті.

«ЕО экспортына 30 пайыздық баж салығын енгізу трансатлантикалық жабдықтау тізбектерін бұзып, екі тараптағы кәсіпкерлер мен тұтынушыларға кері әсерін тигізеді», — деді Урсула фон дер Ляйен.

Мексикаға қатысты Трамп шекарадағы әлсіз бақылау мен есірткі қылмысына қарсы күрестің жеткіліксіздігін атап өтті. Ол сонымен қатар, АҚШ пен Мексика арасындағы сауда теңгерімінің бұзылғанын тілге тиек етті. Егер Мексика қарсы жауап қайтарса, Вашингтон жаңа баж салығын одан әрі арттыруы мүмкін екенін ескертті.

Бұл шешім оқшау қадам емес. Бұған дейін Трамп Канададан жеткізілетін тауарларға 35%, Бразилияға – 50% көлемінде баж салығын енгізетінін хабарлаған. Сонымен қатар, Қазақстан, Жапония, Оңтүстік Корея, ОАР және басқа да елдерге қатысты жаңа сауда шектеулері енгізілетіні айтылды.

Трамптың пайымдауынша, бұл шаралар АҚШ-тың сауда серіктестерін «әділ» келісімдер жасауға мәжбүр етеді. Алайда сарапшылар бұл қадам жаһандық сауда шиеленісін күшейтіп, АҚШ ішіндегі бағаның өсуіне әкелуі мүмкін екенін ескертеді.