Тозығы жеткен №1- аурухананы жөндеу сот арқылы шешілді

Сот арқылы Алматы қаласының иелігіне өткен №1 клиникалық ауруханасына жөндеу жұмыстары жасалынбақ. 

Бұл туралы Алматы әкімдігі хабарлайды.

№1 Алматы қалалық клиникалық ауруханасы қаланың басқаруына өтті. 2018 жылдан бастап ол «Smart Health University City» ЖШС-нің сенімгерлік басқаруында болады. Қаңырап бос қалған аурухана күрделі жөндеуді қажет етеді. №1 клиникалық ауруханасы наурыз айында сот арқылы қаланың иелігіне қайтарылды.

Әкім Ерболат Досаев нысанды аралап, алматылықтарға сапалы медициналық көмек көрсету үшін медициналық мекемені дамытудың маңыздылығын атап өтті.

   Сейсмикалық қауіпсіздікті күшейту, жабдықтарды жаңарту және бөлімшелерді кеңейту жоспарланған.

«Ауруханаға бұрынғы мәртебесін қайтару, қасбетіне жөндеу жұмыстарын жүргізу, қажет болған жағдайда медициналық оңалту бөлімшесін кеңейту, азық-түлік бөлімін оңтайландыру, оттегі стансасын ретке келтіру қажет», - деді қала басшысы.

Аурухана 1983 жылы құрылған, 100 орынды нысан пульмонология бойынша бүкіл қалаға қызмет көрсете алады.