Төрт баланың анасы соқырішектен қайтыс болды

42 жастағы әділет капитаны, төрт баланың анасы Гүлнұр Жуанышбаева 27 сәуірде соқырішектен қайтыс болды. Кішкентай ұлы небәрі үш жаста, деп хабарлайды Orda.kz.       

Ол бір апта бұрын Жаңаарқаның орталық аудандық ауруханасына жай ғана соқырішек диагнозымен түскен болатын.

Ота жалпы наркозбен жасалды. Бірақ ота кезінде әйелдің денесі анафилактикалық шокқа түсіп, жүрегі тоқтап қалады. Клиникалық өлім — 23 минут. Дәрігерлер оны қайта тірілткенмен, мидың ісінуі басталды. Нәтижесінде науқас жеті күннен кейін көз жұмған.

Марқұмның туыстарының айтуынша, бұл — Жаңаарқа ауруханасындағы сапасыз медициналық көмек салдарынан болған алғашқы қайғылы жағдай емес.

Бұрын да осындай жағдайлар болған:

Бір жыл бұрын соқырішекке ота жасалған соң 17 жастағы жасөспірім қайтыс болды. Фармбақылау тексеріс жүргізіп, заңбұзушылық таппаған. Қылмыстық іс «қылмыс құрамы жоқ» деп жабылды. Алайда баланың анасы жараның іріңдеуі дәрігерлердің кінәсінен болды деп есептейді.

Биыл наурызда тағы бір қайғылы жағдай тіркелді:  Александра Гончардың жаңа босанған жұбайы инсульттан қайтыс болды. Ол да сол аурухананың бірнеше бөлімінде ем алған.

Жергілікті тұрғын Мағаз Абдығазымов былай дейді:

«Бұл — үмітсіздіктің айғайы. Біз ешкімнен кек алғымыз келмейді, біз тек Жаңаарқа ауданының денсаулық сақтау жүйесінде қалыптасқан жағдайды анықтағымыз келеді. Оталардан кейін, ем қабылдағаннан кейін адамдар жиі қайтыс бола бастағаны алаңдатады. Мұнда біліктілігі төмен мамандар жұмыс істейді. Ең қарапайым қателіктер жібереді, ал ол кейін адам өліміне алып келеді. Халық дәрігерлерге сенуден қалды». 

Жағдай Денсаулық сақтау министрлігіне дейін жетті. Қазір ауруханада облыстық денсаулық сақтау басқармасы басшысының орынбасары Еркебұлан Бейсембаев жұмыс жүргізіп жатыр.