Төреғали Төреәлі қоғамдық жұмысқа жегіледі

Қазақ эстрадасының жұлдызы билік өкіліне тіл тигізгені үшін 40 сағат қоғамдық жұмысқа тартылды.

Әнші полицияның назарына 14 маусым күні түскен. Кейіннен оның «Лексус» көлігі Алматыда Майлин көшесінде тоқтатылды. Ол полиция қызметкерлеріне қарсылық көрсетті.

Одан кейін әнші есірткіге мас күйінде көлік жүргізіп, көлікке зақым келтіргені үшін 20 тәулікке қамауға алынып, 7 жылға жүргізуші куәлігінен айырылды.

Әнші Төреғали Төреәлі полиция қызметкерінің талабын орындамағаны үшін тағы үш тәулікке қамауға алынды. Енді сот мемлекеттік қызметкерлерді қызметтік міндеттерін атқару кезінде балағаттау туралы істі қарастырды.

«Сот биылғы жылдың 14 маусымында Майлин көшесінде Lexus автокөлігінің тоқтатылғанын анықтады. Полиция қызметкерлерінің заңды бірнеше рет қойған талабына жауап ретінде жүргізуші А., полиция қызметкерлеріне әдепсіз сөздер айтып, қарсылық көрсетіп, қызметтік міндеттерін атқару кезінде билік өкілдеріне тіл тигізу арқылы көліктен шығудан үзілді-кесілді бас тартқан. Сотталушының кінәсі іс бойынша жәбірленушілер мен куәлардың айғақтары, бейнежазба және т.б. жиналған ақпарат бойынша дәлелденді»  делінген соттың баспасөз хабарламасында. 

Ұсынылған баптың санкциясында қоғамдық жұмыстарға тарту немесе 20 тәулікке қамауға алу қарастырылған. Сот 40 сағат қоғамдық жұмысқа тарту туралы шешім шығарды. Сот жеңілдететін мән-жайлар ретінде 5 баласының бар екенін ескерді. Ауырлататын жағдай – есірткі қолдану.

Сот отырысының соңғы күні Төреғалидың адвокаттары сөз сөйлеген пікірталас белгіленген болатын. Олардың ұстанымын тыңдаған судья соңғы сөзді әншіге берді. Ол өз сөзінде оның ұятсыз сөздері полицияға жеке басына айтылмағанын,  эмоциясын білдіру үшін тұтқындау кезінде жалпы мазмұнда айтылғанын атап өтті.

«Сотталушы Әлихановты (Төреғали Төреәлінің шын аты-жөні – ескерту) Қылмыстық кодекстің 378-бабының 1-бөлігімен кінәлі деп танып, оған 40 сағат қоғамдық жұмыстарға тарту тағайындалсын. Сондай-ақ одан жәбірленушілер қорының пайдасына 17 мың теңге, сондай-ақ сот шығындары үшін 19 мың теңге өндірілсін», - деп судья үкімді жариялады.

Сот үкімі заңды күшіне енген жоқ.