Тоқберген Әбиев ұсталды

Блогер Тоқберген Әбиев 50 миллион теңге бопсалады деген күдікпен қамауға алынды.

Бұл туралы Сыбайлас жемқорлыққа қарсы қызметтің баспасөз қызметі хабарлады.

«Сыбайлас жемқорлыққа қарсы қызмет Т. Әбиевтің бұқаралық ақпарат құралдарында зиянды мәліметтерді тарату және өзінің Youtube-арнасында шындыққа сәйкес келмейтін бейнежазбаларды жою үшін кәсіпкерден аса ірі мөлшерде ақша бопсалады деген күдікпен қылмыстық әрекеттің жолын кесті. 2022 ж. 14 желтоқсанда Әбиев 50 миллион теңгемен ұсталып, сот санкциясымен 2 ай мерзімге қамауға алынды. Бұдан басқа, Әбиев мемлекеттік органдар қызметкерлері мен азаматтарды адастыру мақсатында «Сыбайлас жемқорлыққа қарсы күрес Департаменті» ЖШС-н жеке заңды тіркегені анықталды.

Аталған ұйымның басшысы болып көрініп, сол арқылы билік өкілінің бейнесін жасай отырып, Әбиев кәсіпкерлер мен мемлекеттік органдардың лауазымды адамдарынан өзінің жеке мүддесі үшін іс-әрекеттер жасаған. Сондай-ақ заңда белгіленген тәртіпті бұза отырып ақпарат пен материалдар беруді талап еткен. Әбиев тек өзіне-өзі қызмет етуді көздей отырып, ақшалай сыйақы үшін жеке тұлғаларға өз ұйымы қызметкерінің қызметтік куәліктерін көрсетіп, оларды билік өкілінің мәртебесі турасында жаңылыстырды.

Алайда, Әбиевтің қызметі құқық қорғау органдарының жұмысымен ешқандай байланысты емес. Әбиевтің басқа да осыған ұқсас қылмыстарға қатысы туралы ақпарат тексеріледі. Әбиевтің заңсыз қызметінің барлық осындай фактілері туралы Сыбайлас жемқорлыққа қарсы қызметке 1424 нөмірі бойынша хабарласуыңызды сұраймыз. ҚР ҚПК-нің 201-бабына сәйкес өзге ақпарат жария етуге жатпайды» делінген хабарламада.

14 желтоқсанда Әбиевтің 50 миллион теңге алғаннан кейін ұсталғаны атап өтілген. Сот санкциясымен ол екі ай мерзімге қамауға алынды.