Тоқаевтың ұлықтау рәсімінен кейінгі ресми сапарлары

Ұлықтау рәсімінен кейін 2022 жылдың 28 қарашасында Президент Қасым-Жомарт Тоқаев Ресей Федерациясына ресми сапармен барады. Мәскеуде мемлекет басшысы президент Владимир Путинмен келіссөздер жүргізеді.

Ақорданың тelegram-арнасында атап көрсетілгендей, екі ел басшылары бейнебайланыс арқылы Қазақстан мен Ресейдің өңіраралық ынтымақтастығы форумының жұмысына да қатысады.

Сонымен қатар, 29-30 қарашада Қазақстан Президенті Францияға ресми сапармен барады.

«Қасым-Жомарт Тоқаев Парижде Франция президенті Эммануэль Макронмен келіссөздер өткізуді жоспарлап отыр, оның барысында сауда-экономикалық, инвестициялық және гуманитарлық салалардағы стратегиялық әріптестікті дамыту перспективалары талқыланады»  делінген хабарламада.

Сондай-ақ, мемлекет басшысының француздық іскер топ өкілдерімен бірқатар кездесулер өткізетіні хабарланды.

Президент Қасым-Жомарт Тоқаевтың инаугурациясы 2022 жылдың 26 ​​қарашасында өтеді. Қазақстандықтар ұлықтау рәсімін Астана уақыты бойынша сағат 10:50-де тікелей эфирде республикалық телеарналардан, интернет-ресурстардан, сондай-ақ Ақорданың әлеуметтік желілердегі ресми парақшаларынан көре алады.