Тоқаев жездесін лауазымды қызметінде қалдырды

5 маусымда өткен референдумда қабылданған өзгерістер бойынша президенттің жақын туыстары басшылық қызметтерді атқара алмайды. Референдумға дейін әділет министрі, Тоқаевтың әпкесінің күйеуі Теміртай Ізбастин елші қызметінен кетуі керек екенін еске салған. Дегенмен араға үш ай салып, министр Ізбастинді танымайтынын мәлімдеді.

Азаттық радиосының хабарлауынша, референдум қарсаңында өткен брифингте әділет министрі Қанат Мусин өзгерістер қабылдана салысымен Теміртай Ізбастиннің Болгариядағы Қазақстанның өкілетті елшісі қызметінен кетуі керек екенін алға тартқан.

«Мұндай тыйым енгізілген соң, заң аясында бірден жүзеге асырылады. Ол бұл қызметті босатады, себебі заң жүзінде бұл қызметті атқара алмайды» деді Қанат Мусин.

Референдумнан кейін үш ай өткенімен, Тоқаевтың әпкесінің күйеуі әлі де елші қызметінен кетпеген. Бұл туралы журналистің сұрағына жауап берген Қанат Мусин бұл жолы Ізбастинді танымайтынын мәлімдеді. 

«Лауазымдарын босататын туыстардың тізімі бар заңда. Сол бапқа сүйеніп, жүзеге асады. Мен Ізбастинді білмеймін. Туыстығына байланысты, заңда барлығы көрсетілген» деді Мусин.

Еске салсақ, Тоқаевтың жездесі Теміртай Ізбастин Қазақстанның Болгариядағы дипломатиялық миссиясын 2009 жылдан басқарып келеді. Ал Қасым-Жомарт Тоқаев президент болып сайланған соң Ізбастин елші қызметіне тағайындалған. 

Ал президенттің немере інісі Теміртай Ізбастиннің ұлы Бекет Ізбастин PSA компаниясында директор қызметін атқарады. Бұл – «ҚазМұнайГаз» ұлттық компаниясының еншілес ұйымы. Сәйкесінше квазимемлекеттік сектор болып саналады.