Тоқаевтың бұйрығымен бірқатар судьялар орындарын босатты

Астана, Алматы және екі облыс соттарында кадрлық өзгерістер болды. Бұл ретте екі судья тәртіптік теріс қылық жасағаны үшін қызметінен босатылды.

«Алматы қаласы бойынша: Бостандық ауданының № 2 аудандық сотының судьясы – Сырлыбаев Қанат Қадірұлына сот алқасының қаулысымен судьяны тәртіптік теріс қылық жасағаны үшін қызметінен босатылсын;

Қызылорда облысы бойынша: мамандандырылған ауданаралық экономикалық сотының судьясы – Бекмамбетов Ғалымжан Вахитұлына  тәртіптік теріс қылық жасағаны үшін қызметінен босату қажеттігі туралы Сот алқасы шешімімен босатылсын» делінген Президент Қасым-Жомарт Тоқаевтың жарлығында.

Қостанай облысы облыстық сотының төрағасы Смолин Анатолий Сергеевич те (отставкаға кетуіне байланысты) қызметінен босатылды. Астана қаласында кәмелетке толмағандардың істері жөніндегі мамандандырылған ауданаралық сотының судьясы Қабиденова Динара Хакімқызы бұйрықпен (басқа жұмысқа ауысуына байланысты) және қылмыстық істер жөніндегі мамандандырылған ауданаралық сотының судьясы Әлхожаев Қыдырбек Қорғанбекұлы (қайтыс болуына байланысты) қызметінен босатылды.

Осы ретте Тоқаев Марлен Мәлімгерейұлы Бекетовты Астана қаласының мамандандырылған ауданаралық әкімшілік сотының судьясы қызметіне және Ақтөбе сотының судьясы ретінде – Омарова Марал Мырзахметқызын тағайындады.