Тоқаев жаңа Төтенше жағдайлар министрін тағайындады

Мемлекет басшысының Жарлығымен Сырым Дүйсенғазыұлы Шәріпханов Қазақстан Республикасының Төтенше жағдайлар министрі болып тағайындалды.

56 жастағы Шәріпханов Алматы қаласының тумасы, азаматтық қорғаныс жүйесінде әртүрлі уақытта лауазымды және басшылық қызметтер атқарған.

Ақорданың мәліметінше, Шәріпханов 1967 жылы 1 мамырда Алматы қаласында дүниеге келген.

1991 жылы М.Чистяков атындағы Қазан жоғары әскери командалық-зымырандық әскерлер инженерлік училищесін бітірген. Техника ғылымдарының докторы, генерал-майор.

1997 жылдың маусымынан 1999 жылдың ақпанына дейін - Жамбыл облыстық Төтенше жағдайлар департаменті Оқыту және тәрбиелеу орталығының бастығы.

2008 жылғы қыркүйектен 2010 жылғы ақпанға дейін - Алматы қаласы Төтенше жағдайлар департаменті Азаматтық қорғаныс басқармасының бастығы.

2014 жылдың қазанынан 2020 жылдың қарашасына дейін – Қазақстан Республикасы Ішкі істер министрлігі Төтенше жағдайлар комитеті Көкшетау техникалық институтының бастығы.

2021 жылдан бастап Қазақстан Республикасы Төтенше жағдайлар министрлігі М.Ғабдуллин атындағы Азаматтық қорғау академиясының бастығы.

Еске салайық, осыдан бірнеше сағат бұрын Қасым-Жомарт Тоқаев Юрий Ильинді Төтенше жағдайлар министрі қызметінен алып тастаған болатын.