Тоқаев Үндістан Премьер-Министріне көңіл айтты

Қазақстан Президенті Қасым-Жомарт Тоқаев Үндістан Премьер-Министрі Нарендра Модиге көңіл айту жеделхатын жолдады.

Қазақстан Президенті Үндістанда болған теміржол апаты салдарынан көптеген адам қазасына байланысты көңіл айту жеделхатын жіберді.

«Мен Одиша штатындағы Баласоре қаласында көп адамның өмірін қиған жантүршігерлік теміржол апаты туралы қайғылы хабарды қатты өкінішпен қабылдадым. Қазақстан халқының атынан және жеке өз атымнан жақындарынан айырылған отбасыларына шын жүректен көңіл айтамын. Барлық зардап шеккендердің тезірек сауығып кетуін тілеймін. Осы қаралы сағатта біз Үндістан халқымен ынтымақтастығымызды қуаттаймыз» делінген Ақорданың Telegram-каналында жарияланған Мемлекет басшысының сөзінен үзіндіде.

Үндістанда Баласор қаласына жақын жерде жолаушылар және жүк пойыздары соқтығысқан апат болды, деп хабарлайды Hindustan Times. Төрт вагон рельстен шығып, аударылып қалды. Жолаушылар пойызы Калькуттадан Ченнайға бет алған. Соңғы мәліметтер бойынша, пойыз апатынан зардап шеккендер саны 288 адамға жеткен. Мыңнан астамы жарақат алды. Құтқару жұмыстары жалғасуда, ал жарияланған сандар түпкілікті емес. Бұл апат Үндістандағы ондаған жылдардан бергі ең көп адам өлімі болып отыр.

Құтқару операциясы жалғасуда, адамдарды іздеуге иісшіл иттер жұмылдырылды. Премьер-министр Нарендра Моди қаза тапқандардың әрқайсысының отбасына 2 миллион рупий (шамамен 24 мың доллар) төлейтінін хабарлады. Зардап шеккендердің әрқайсысына 50 000 рупий (600 доллар) төленеді.