Тоқаев Смайыловтың 2023 жылға арналған жоспарын тыңдады

Әлихан Смайылов Қасым-Жомарт Тоқаевқа 2023 жылға арналған үкімет қызметінің негізгі бағытының жоспарлары туралы баяндады.

Ақорданың хабарлауынша, Қасым-Жомарт Тоқаевқа оның сайлауалды бағдарламасын жүзеге асыру бойынша жүргізіліп жатқан жұмыстар мен жоспарлар, үкіметтің экономикалық саясаты, оның ішінде инфляцияны төмендету, мұнай-газ және энергетика салаларын, өңдеу өнеркәсібі, ауыл шаруашылығы, кәсіпкерлік және т.б.экономиканың салалары туралы жан-жақты баяндалды.

«Әлихан Смайылов реттеудің 44 бағыты бойынша бизнеске кедергі келтіретін 10 мыңға жуық талаптардың күшін жою және қайта қарау, шағын және орта бизнесте жұмыспен қамтылғандар санын 3,8 миллион адамға дейін арттыру, 4,2 триллион теңгеге 289 жаңа инвестициялық жобаны іске асыру жоспарланғанын айтты. 38 мың жұмыс орнын құру, бірқатар ірі инфрақұрылымдық нысандарды салу туралы ақпарат берді» делінген хабарламада.

Сондай-ақ Смайылов Тоқаевқа «ішкі нарықты отандық өндірілген тауарлармен қанықтыру, азық-түлік қорларының қызметін қайта форматтау, жаңа форматтағы мектептер салу, ауылдық денсаулық сақтау нысандарын жаңғырту, азаматтарды жұмыспен қамту» жоспарлары туралы айтқан.

Премьер-министр экспорттың, нақты жалақының және тұтастай алғанда экономиканың өсуін, сондай-ақ инфляцияның төмендеуін қамтамасыз ететін алдағы жылға республиканың әлеуметтік-экономикалық дамуын болжады. Тоқаев үкіметке «Сайлау бағдарламасын жүзеге асыру бойынша кешенді шаралар қабылдауды, сондай-ақ мемлекеттің макроэкономикалық жоспарлары мен әлеуметтік міндеттемелерін орындауды қамтамасыз етуді» тапсырды.