Тоқаев Сирияға гуманитарлық көмек жіберуді тапсырды

Президент Қасым-Жомарт Тоқаев Сирияға гуманитарлық көмек жөнелтуді тапсырып, қазақстандық құтқарушылардың Түркиядағы жұмысына оң баға берді, деп хабарлайды Ақорданың баспасөз қызметі.

«Мемлекет басшысы Төтенше жағдайлар министрі Юрий Ильиннің баяндамасын тыңдады. Мемлекет басшысына қазақстандық құтқарушылардың Түркияның жойқын жер сілкінісінен зардап шеккен аймақтарындағы іздестіру-құтқару жұмыстарына қатысуы туралы баяндалды. Төтенше жағдайлар министрлігінің қызметкерлері қиын жағдайларға қарамастан, жергілікті атқарушы органдармен тығыз байланыста отырып, жоғары кәсібилік танытып, өз міндеттерін табысты атқаруда. Әзірге аман қалған төрт адам құтқарылды» делінген хабарда.

Мемлекет басшысының тапсырмасы бойынша жоғалған Қазақстан азаматтарын іздеу үшін бүгін таңертең Хатай қаласына бір топ құтқарушылар мен кинологиялық топ келді.

«Тоқаев қазақстандық құтқарушылардың жұмысына оң баға беріп, оларға сәттілік тіледі. Президент сондай-ақ үкіметке Ислам Ынтымақтастығы Ұйымы арқылы Сирияға гуманитарлық көмек жіберуді тапсырды» деп толықтырды Ақорда.