Тоқаев Қостанай облысында Kia автокөлігі өндірісін іске қосты

Жаңа желі шағын түйінді құрастыру  (CKD) әдісімен Kia Sportage автомобильдерін шығаратын болады. Орталық Азия мен ТМД елдерінде Kia шығарудың мұндай технологиясы тек Қазақстанда ғана бар.

Мемлекет басшысы өндіріс орындарын аралап, жас жұмысшылармен әңгімелесті.

— Шынымен, зауыт әсерлі. Өте таза өндіріс, жоғары өндіріс мәдениеті. Жаңа ғана бізге Kia Sportage үлгісін көрсетті. Бұл көліктің сапасы өте жақсы. Сондықтан сұраныс жоғары болады деп ойлаймын. Кәсіпорынды одан әрі кеңейту үшін инвесторлар шақырамыз. Менің ойымша, кәсіпорында алдағы уақытта еш қиындық болмауы керек. Біз жастарды қолдауға үлкен мән береміз, – деді Мемлекет басшысы.

Қазақстан Президенті көліктің капотына қолтаңба қалдырды.

Биылдың өзінде Kia Cerato өндірісі үшін CKD желісін іске қосу жоспарлануда. Кәсіпорын техникалық оқу орындарымен ынтымақтастық орнатқан. Кадрларды даярлауға жағдай жасау мақсатында оқу орындарының студенттері мен түлектеріне арналған 250 орындық заманауи қалашық құрылысы басталды.

Зауыт басшылығының айтуынша, 2022 жылы 614,2 млрд теңгенің өнімі өндірілген. Экспорт 21,5 млрд теңгені құрады. Компанияда 2 мыңнан астам адам жұмыс істейді.