Тоқаев қазақстандықтарды Рамазан айының басталуымен құттықтады

Қасым-Жомарт Тоқаев Қазақстан халқын қасиетті Рамазан айының басталуымен құттықтады.

«Барша мұсылмандар үшін маңызы зор қасиетті Рамазан айының басталуымен баршаңызды шын жүректен құттықтаймын! Бұл – адамның рухани тазаруына, жан-жақты жетілуіне ықпал ететін табандылық, жанашырлық, байсалдылық сияқты құндылықтар дәріптелетін ерекше кезең.

Ата-бабамыз Рамазанды «он екі айдың сұлтаны» деп құрметтеп, ораза ұстағандарға ауызашар жасап, бір-біріне  құрметін білдірген.

Ғасырлар бойы Ұлы даланың көптеген салт-дәстүрлері мен әдет-ғұрыптары тығыз байланысты ислам діні елімізде бірлік пен келісімді сақтауда маңызды рөл атқарды.
Қайырымдылық айында халқымыз игі істері еселеніп, жемісін берсін!

Баршаңызға зор денсаулық, амандық тілеймін! Ораза қабыл болсын!» деп құттықтады Қасым-Жомарт Тоқаев.

Қазақстанда қасиетті Рамазан айы 23 наурызда басталды. Ораза 20 сәуірге дейін жалғасады.