Тоқаев QazaqGaz басқарма төрағасын қабылдады

Қазақстан Республикасының Президенті Қасым-Жомарт Тоқаев QazaqGaz басқарма төрағасын қабылдады, деп хабарлады Ақорда.

«Мемлекет басшысы «QazaqGaz» ҰК» АҚ басқарма төрағасы Санжар Жаркешовті қабылдады. Қасым-Жомарт Тоқаев ұлттық компанияның 2022 жылға арналған қызметі  қорытындылары, алдағы кезеңге арналған жоспарлар мен  газ саласының стратегиялық көзқарасы туралы есебін тыңдады»  делінген жұма күні таратқан хабарламада.

Сондай-ақ Президентке газ саласындағы реформаларды жүзеге асыру бойынша ұсыныстар айтылды.

Мемлекет басшысына халықты үздіксіз көгілдір отынмен қамтамасыз ету бойынша қабылданып жатқан шаралар туралы баяндалды. 2022-2023 жылыту маусымында Қазақстанда газ тұтынудың тарихи шегін тіркеді.

Қасым-Жомарт Тоқаевқа Қашаған кен орнындағы газ өңдеу зауытының құрылысы туралы ақпарат берілді. QazaqGaz жүзеге асырып жатқан басым инвестициялық жобалардың қатарында Алматыдағы жылу электр орталығына газ құбырын тарту, Бейнеу-Жаңаөзен газ құбырының екінші желісін салу, Мақат-Солтүстік Кавказ газ құбырын кеңейту және т.б. жұмыстар мәлім етілді.

Сонымен қатар, мемлекет басшысына ұлттық компанияның ресурстық базаны ұлғайту және геологиялық барлау бағдарламасын жүзеге асыру бойынша белсенді жұмысы туралы баяндалды.

Санжар Жаркешов шығындарды оңтайландыру нәтижесінде жыл соңына дейін ұлттық компанияның қарызы 26 пайызға қысқарғанын айтты.

Кездесу қорытындысы бойынша Мемлекет басшысы газ саласының инвестициялық тартымдылығын арттыру үшін оны реформалауды жалғастыруды тапсырды.