Тоқаев Қашағандағы зауыт құрылысын жеделдетуді тапсырды

Қасым-Жомарт Тоқаев QazaqGaz басшысы Санжар Жаркешовтің есебін тыңдады.

Мемлекет басшысы «QazaqGaz» ұлттық компаниясы» АҚ басқарма төрағасы Санжар Жаркешовті қабылдады. Қасым-Жомарт Тоқаев ішкі нарыққа тауарлық газды басымдықпен жеткізу жөніндегі тапсырмасының орындалу барысы туралы есебін тыңдады, деп хабарлайды Ақорданың баспасөз қызметі.

Сондай-ақ Санжар Жаркешов Мемлекет басшысын газ саласын дамытудың кешенді жоспарының орындалу барысы туралы хабардар етті. Бұл жоспар ресурстық базаны кеңейтуді, елдің газ тасымалдау инфрақұрылымын жаңғыртуды және газ саласын реформалауды көздейді. Заңнамаға тиісті түзетулер жыл соңына дейін қабылданады.

Кездесу қорытындысы бойынша мемлекет басшысы газ саласын дамытудың кешенді жоспарын іске асыруды жалғастыруды, сондай-ақ Қашаған кен орнындағы газ өңдеу зауытының құрылысын жеделдетуді тапсырды.