Тоқаев пен Мәсімовтің қалай танысқаны белгілі болды

Ресейлік журналист және жазушы, қаңтар оқиғасы туралы кітаптың авторы Леонид Млечин Қазақстан президенті Қасым-Жомарт Тоқаевтың ұсталған ҰҚК-нің бұрынғы төрағасы Кәрім Мәсімовпен қалай кездескенін айтып берді.

Тоқаевтың өзіне сілтеме жасаған автор олардың танысу оқиғасын айтып берді.

«1990 жылы Қытайдағы Кеңес елшілігінің ғимаратында маған бір жігіт келіп, өзінің Ухань университетінің студенті екенін, ол жерде қытай тілін оқып жатқанын айтты. Сонда ол: «Мен сенің партком мүшесі екеніңді білемін, маған КОКП-ға өтуге ұсыныс бере аласың ба?» деді.

«Партия ыдырап, кеңестік қоғамдағы жетекші саяси күш болмай қалды» деген менің ескертуіме жауап ретінде Мәсімов партия мұратын нығайтуға үлес қосқысы келетінін нық сеніммен айтты. Сөйтіп мен оның «партиялық өкіл әкесі» болдым. Ал Қазақстанға оралғаннан кейін Мәсімов Тимур Құлыбаев пен оның әйелі Динара Назарбаева сатып алған Халық банкін басқарды» делінген кітапта.

Сондай-ақ автор Мәсімов бұрынғы президент Нұрсұлтан Назарбаевтың күйеу баласы Тимур Құлыбаевпен жас кезінен дос болған деп сендіреді.

Млечиннің айтуынша, олар «қуатты тандем жасады». Мәсімов пен Құлыбаевтың достығы олардың жастық шағынан бастау алады, сол жылдары Мәскеуде бірге оқыған. Мәсімов 1985-1988 жылдары Патрис Лумумба атындағы Халықтар достығы университетіндегі халықаралық құқық факультетінде, ал Құлыбаев 1983-1988 жылдары Ломоносов атындағы Мәскеу мемлекеттік университетінде экономика факультетінде халық шаруашылығын жоспарлау мамандығы бойынша оқыған.

«Әртүрлі оқу орындарына қарамастан Мәскеудегі қазақ студенттері кеңестік дәуірде де этникалық диаспораға ұқсайтын бірдеңе құрып, үнемі тығыз байланыста болған» делінген кітапта.

Жазушы бұған дейін Тоқаевтың «қарсы келгендерге оқ ат» деген бұйрығын Қорғаныс министрі Мұрат Бектанов дұрыс түсінбегенін, ол өз өкілеттігінен асырып, қажет болмаған кезде күш қолданғанын атап өткен.