Тоқаев пен Бердімұхамедовтың кездесуі – президенттер не туралы сөйлесті?

Астанада Қазақстан мен Түркіменстан президенттерінің ресми сапары өтіп жатыр.

Бердімұхамедов алғашқы мемлекеттік сапарын Астанаға жасады. Биыл екі ел арасындағы дипломатиялық қарым-қатынастың орнағанына 30 жыл толып отыр.

Түркіменстан Президентін қарсы алған Қасым-Жомарт Тоқаев екі ел халықтарын тарихи және туысқандық байланыстар біріктіретінін және бұл қазақ-түрікмен ынтымақтастығын одан әрі дамыту үшін үлкен маңызға ие екенін атап өтті.

— Түркіменстан Қазақстан үшін бауырлас мемлекет, біздің шекарамыз ортақ, тарихымыз ортақ. Мәдениет саласында, гуманитарлық байланыстарда және, әрине, экономикалық мүдделерде ортақ тұстарымыз көп, - деді Тоқаев.

Келіссөздер барысында Қасым-Жомарт Тоқаев пен Сердар Бердімұхамедов қазақ-түрікмен ынтымақтастығын дамыту перспективаларын талқылады. Сауда-экономикалық, оның ішінде энергетика, көлік-логистика, өнеркәсіп және ауыл шаруашылығы салаларындағы ынтымақтастықты кеңейтуге ерекше назар аударылды.

Сердар Бердімұхамедов Қасым-Жомарт Тоқаевқа елімізге келуге шақырғаны және қазақ жерінде көрсеткен жылы қонақжайлылығы үшін алғыс айтты.

— Бұл менің Қазақстан Республикасына алғашқы мемлекеттік сапарым. Біз бұл сапарды елдеріміз арасындағы екіжақты қарым-қатынастарды дамытудағы маңызды кезең деп санаймыз, - деді Түрікменстан Президенті.

Сондай-ақ, ол биыл дипломатиялық қарым-қатынастың орнағанына 30 жыл толатынын атап өтті.

— Осы жылдар ішінде екі ел арасындағы қарым-қатынастар кең ауқымда табысты дамып келеді. Осы сәтті пайдалана отырып, сіздерді мерейтоймен құттықтағым келеді, – деді Сердар Бердімұхамедов.

Түркіменстан басшысы Қасым-Жомарт Тоқаевқа Түрікменстан Халық Маслахаты Милли Генгештің төрағасы Гурбангулы Бердімұхамедовтың сәлемі мен ізгі тілегін жеткізді.