Тоқаев Пәкістан президентіне көңіл айту жеделхатын жолдады

Қасым-Жомарт Тоқаев Пәкістандағы адамдардың қазасы мен көпшіліктің зардап шегуіне әкелген жойқын су тасқыны туралы хабарды қатты қайғыра қабылдағанын жеткізді.

Мемлекет басшысы жеделхатта Пәкістан Президенті Ариф Альвиге және жақындарынан айрылған отбасыларына көңіл айтып, қайғысына ортақтасып, осы қиын кезеңде Пәкістан халқы мен үкіметімен бірге екенін білдірді.

Пәкістанда муссон жаңбыры салдарынан маусым айының ортасынан бері 937 адам қайтыс болды. Пәкістан халықаралық қауымдастықты көмек көрсетуге шақырды, өйткені ел өткен айдан бері 900-ден астам адамның өмірін қиған нөсер жаңбырдың салдарын жеңуге тырысуда.

Апаттарға қарсы ұлттық басқарманың (NDMA) есебінде соңғы 24 сағат ішінде бүкіл ел бойынша 150 шақырым жол және 82 мыңнан астам үй бүлінген.