Тоқаев Мұхаммед пайғамбар мешітіне зиярат етті

Президент Қасым-Жомарт Тоқаев Сауд Арабиясы Корольдігіне жұмыс сапарында Исламда екінші қасиетті орын саналатын Медина қаласындағы Мұхаммед пайғамбар мешітіне барды. Бұл туралы Ақорданың баспасөз қызметі хабарлады.

«Мемлекет басшысы Мұхаммед пайғамбардың қабіріне зиярат етіп, дұға жасады. Қазақстан Президентінің келуіне орай оған ерекше құрмет ретінде Пайғамбар жерленген киелі орынның есігі ашылды» деп жазылған хабарламада.

Айта кетейік, Қасым-Жомарт Тоқаев 19 шілде күні Жидда қаласында өтетін «Орталық Азия + Шығанақтағы араб мемлекеттерінің ынтымақтастық кеңесі» атты мемлекеттер басшыларының бірінші саммитіне қатысады.