Тоқаев Ердоғанды ​​және бүкіл түрік халқын Түркия күнімен құттықтады

Қасым-Жомарт Тоқаев Президент Режеп Тайып Ердоғанды ​​және бүкіл түрік халқын Түркия Республикасының күнімен құттықтады. 1923 жылы дәл осы күні Түркия республика болып жарияланды.

«Бұл дата сіздердің елдеріңіздің тарихында маңызды орын алатыны сөзсіз. Ол халықтың бірлігі мен ынтымағын бейнелейді, еркіндік пен жасампаздықтың бірегей символы қызметін атқарады. Осы құндылықтарды біріктірген Түркия жетістіктерін бүкіл әлем қауымдастығы мойындаған беделді мемлекетке айналды. Осының барлығы Сіздің мемлекеттік басқарудағы бай тәжірибеңіздің, қажырлы еңбек пен дара тұлғалық қасиеттеріңіздің арқасында мүмкін болды. Сіздің  басшылығыңызбен Түркия Республикасы әлемдік аренадағы беделін нығайтып, түрік халқының әл-ауқаты одан әрі арта түсетініне сенімдімін» делінген Қасым-Жомарт Тоқаевтың құттықтау жеделхатында.

Ол Қазақстан мен Түркия арасындағы дипломатиялық қарым-қатынастың 30 жыл бұрын орнатылғанын, бүгінде ынтымақтастық кеңейтілген стратегиялық серіктестік рухында қарқынды дамып келе жатқанын еске салды.

Тоқаев Ердоғанға жауапты қызметінде үлкен табыс, оның отбасы мен жақындарына амандық, ал бүкіл түрік халқына бейбітшілік пен гүлдену тіледі.