Тоқаев елордадағы саябақта ағаш отырғызды

Астанадағы саябақтардың бірінде Қазақстан Президентінің қатысуымен сенбілік өтті.

Қасым-Жомарт Тоқаев елорданың желілік саябағында «Жасыл Астана» экологиялық айлығы аясында ұйымдастырылған қалалық сенбілікке қатысты. Мемлекет басшысы волонтерлармен және студенттермен әңгімелесті.

«Қазақстан – біздің ортақ үйіміз. Ал біз өз үйімізді таза ұстауымыз керек. Ағаш отырғызып, көшелерді тазалау керек. Бұл біздің қасиетті азаматтық борышымыз. Бізде басқа мемлекет жоқ. Баршаңызды саналы азамат болуға шақырамын. Баршаңызға, әсіресе еріктілерге алғыс айтамын», - деді Қасым-Жомарт Тоқаев.

Сенбілікке 2 қарағай көшеті мен 39 жөке көшеттері отырғызылғаны атап өтілді.

Тоқаевқа елорданы одан әрі абаттандыру және көркейту жоспары ұсынылды. Астана әкімі Жеңіс Қасымбектің айтуынша, биыл қалада миллионнан астам жасыл желек: түрлі ағаштар мен бұталардың көшеттерін отырғызу жоспарлануда. Сондай-ақ Есіл өзенінің бойындағы саябақтар мен демалыс орындарын қалпына келтіру жұмыстары жүргізілмек.