Мемлекет басшысы еліміздің адам құқықтарын қорғау мәселелері бойынша тығыз байланыс орнатуға және ақпарат алмасуға дайын екенін мәлімдеді.
Мемлекет басшысы Қасым-Жомарт Тоқаев БҰҰ Адам құқықтары жөніндегі Жоғарғы комиссары Фолькер Түрікті қабылдады, деп хабарлайды Orda.kz Ақордаға сілтеме жасап.
Мемлекет басшысы Түрік мырзаның сапары ынтымақтастықты одан әрі нығайту үшін маңызды екенін атап өтіп, Қазақстанның адам құқықтарын қорғау мәселелері бойынша тығыз байланыстар орнатуға және ақпарат алмасуға дайын екенін мәлімдеді.
— Қазақстан БҰҰ-ның барлық негізгі конвенциялары мен хаттамаларын ратификациялады, ұлттық деңгейде адам құқықтары саласындағы белсенді өзара іс-қимылдың жұмыс тетіктері құрылды, – деді Президент.
Түрік мырза ұйым мен Қазақстан билігі арасындағы адам құқықтарын қорғау бойынша жылдар бойы қалыптасқан ынтымақтастық деңгейін оң бағап, Тоқаевтың қоғамдық-саяси өмірде бастау алған реформаларының дер кезінде жүргізілгендігін атап өтті.
— Мен соңғы бір жылда Қазақстанда болып жатқан оқиғаларды бақылап отырдым. Азаматтардың құқықтарын қорғау реформалардың құрамдас бөлігі болғаны маңызды, өйткені бұл елдің болашағына қатысты, – деді Жоғарғы комиссар.
Ол биыл Адам құқықтарының жалпыға бірдей декларациясының қабылданғанына 75 жыл толатынын және БҰҰ бұл мерейтойды әлемде қалыптасқан келіспеушіліктерді еңсеру мүмкіндігі ретінде пайдалануды ұсынатынын айтты.
