Тоқаев бірқатар мемлекеттегі Құран өртеу әрекетіне пікір білдірді

Президент Қасым-Жомарт Тоқаев Солтүстік Еуропаның бірқатар мемлекетінде болған Құран өртеу актілеріне қатысты пікір білдірді.

Тоқаевтың айтуынша, бұл қазіргі әлемдегі жағдайды шиеленістіруге, халықтар мен мемлекеттер арасындағы сенімге нұқсан келтіруге бағытталған арандатушылық әрекет.

«Қазақстан – Әлемдік және дәстүрлі діндер көшбасшылары съезін өткізуге бастамашы болған мемлекет. Бұл форум дәстүрлі діндер мен конфессиялардың көрнекті өкілдері арасындағы тиімді әрі табысты диалог алаңына айналды» деп жазылған хабарламада.

Президенттің пікірінше, жиілеп кеткен діни вандализм мен аталған ел азаматтарының жауапсыз әрекеті мемлекеттер мен діндердің бейбіт қатар өмір сүруіне кері әсерін тигізеді. БҰҰ Бас Ассамблеясы да бұл мәселеге қатысты өз ұстанымын білдіруі керек.