Тоқаев әйелдерді 8 наурыз мерекесімен құттықтады

Қазақстан Президенті Қасым-Жомарт Тоқаев әйелдерді Халықаралық әйелдер күнімен құттықтады, деп хабарлайды Ақорда.

«Құрметті әйелдер! Сіздер әлемді мейірім мен шуаққа толтырып, жақындарыңызға сүйіспеншілік пен қамқорлық сыйлайсыздар, жас ұрпақтың бойына жоғары гуманистік мұраттарды, еңбекқорлықты, білімге құштарлықты қалыптастырасыздар. Адамзаттың сұлу бөлігінің отбасындағы, қоғам өміріндегі, мемлекеттің жан-жақты дамуындағы рөлі бүгінде шынымен де орасан зор» делінген құттықтауда.

Президент қазақстандық әйелдер өндірісте, шығармашылықта, саясатта, бизнесте және басқа да көптеген салаларда үлкен жетістіктерге қол жеткізіп жатқанын атап өтті.

«Мемлекет әрқашан гендерлік теңдікті қамтамасыз етуге, әйелдер құқығын қорғауға және отбасы құндылықтарын нығайтуға ерекше көңіл бөлетін болады. Әйелдердің амандығы – ұлтымыздың табысты болашағының кепілі. Әрқайсыңызға зор денсаулық, бақыт және көктемгі көңіл-күй тілеймін!»  делінген Президент құттықтауында.