Томирис Байсафаның өліміне күдікті азамат бостандыққа шықпайды

23 наурыз күні Мәскеу мемлекеттік халықаралық қатынастар институтында (МГИМО) оқыған қазақстандық студент Томирис Байсафаны өлтіру бойынша алдын ала сот отырысы өтті.

Бұл туралы Orda.kz. хабарлады.

Қайтыс болған қыздың анасы Жанна Ахметованың айтуынша, күдіктінің адвокаттары соттан Меджидовты кепілдікке босатуды және үй қамауына алуды сұраған. Бірақ сот оның өтінішін қабылдамады.

Келесі сот отырысы 26 наурызға жоспарланған.

Бұған дейін марқұмның анасы тергеу аяқталып, Меджидовтың кінәсі толық дәлелденді деп жазған.

Еске салсақ, 2018 жылдың 13 сәуірінде 21 жастағы Томирис Байсафа университет терезесінен құлап кеткен. Қыз 3 мамырда көз жұмған.

Дағыстандық экс-шенеуніктің ұлы Муртузали Меджидов қызды өлтірді деп айыпталуда. Ол 2020 жылы шілдеде қамауға алынды. Қайғылы оқиға кезінде ол Томириспен бірге аудиторияда болғандығы анықталған. Қыздың анасы да жастардың екі жылдан бері кездесіп жүргенін мәлімдеді. Сондай-ақ, қыздың анасы күдікті жауапкершіліктен жалтару үшін бірнеше рет айғақтарын өзгерткенін айтты.