Токио-2020: Қазақстандық балуандар есе жіберіп алды

Токио Олимпиадасында грек-рим күресінен Мейрамбек Айнағұлов пен 76 келі салмақ дәрежесінде әйелдер арасынан Эльмира Сыздықова алғашқы кездесуден ақ сүрініп, қарсыласына есе жіберді.

Қазақстандық спортшы 60 келіде қырғызстандық Жоламан Шаршенбековпен бозкілемге шыққан болатын. Қырғыз спортшысы да  осал емес. 2018 жылы әлем чемпионатында күміс жүлдегер атанған. Ал Мейрамбек 2017 және 2019 жылдарда әлем чемпионатында екі медаль алған.

Дегенмен бүгінгі белдесуде қырғыз балуаны басым түсті. Мейрамбекті 8:0 есебімен ұтып кетті. Нәтижесінде ширек финалға жолдама алды.

76 келі салмақ дәрежесінде әйелдер арасынан Эльмира Сыздықова күреске түсті. Алғашқы айналымда оның қарсыласы қырғызстандық Айпері Медетқызы болды. Кездесу 8:1 есебімен қырғызстандық спортшының еншісіне тиді. Қырғызстандық Айпері Медетқызы финалға шыққан жағдайда Қазақстан спортшысы Эльмира Сыздықова жұбаныш белдесуінде күресуге мүмкіндік алады. Айта кетерлігі, жарыстың бірінші күні  грек-рим күресінің балуандары да белдеседі.

Олимпиадада енді грек-рим күресінен Демеу Жадыраев (77 келі) пен Нұрсұлтан Тұрсынов (87 келі) ел намысын қорғайды.

Сонымен қатар бүгін бокстан Қамшыбек Қоңқабаев (91 келіден жоғары) пен Әбілхан Аманқұл (75 келі) шаршы алаңға шығады.