Тоқаев жазушы Төлен Әбдікке жеделхат жолдады

Тоқаев Қазақстанның халық жазушысы, драматург, қоғам қайраткері Төлен Әбдікке жеделхат жолдады, деп хабарлайды Orda.kz.

Президент Қазақстанның халық жазушысы, драматург, қоғам қайраткері Төлен Әбдікке «Егемен Қазақстан» газетінде жарияланған сұхбатына орай жеделхат жолдады.

«Егемен Қазақстан» газетіне берген сұхбатыңызды мұқият оқып шықтым. Өзекті ой-толғамдарыңыз арқылы ұлт руханияты үшін құнды дүниелер айтылған. Төл әдебиетіміздің даму көкжиегіне қатысты сын-пікірлеріңіз бен жас буынға қарата айтқан ақыл-кеңестеріңіз орынды деп санаймын. Шын мәнінде, жаһанды жайлаған қазіргідей құбылмалы заманда жазушылар қауымы көркем туындылары арқылы әділдік, жақсылық және адамдық құндылықтарын кеңінен дәріптегені жөн. Бұл еліміздің келешегі үшін өте маңызды. Қаламыңыз қарымды болсын! Сізге мықты денсаулық, бақ-береке және толайым табыс тілеймін!» деп жазылған жеделхатта.

Еске салайық, Қазақстан президенті Қасым-Жомарт Тоқаевтың «Ана тілі» газетінде жарияланған сұхбаты жапон тіліне аударылды. Аударманы INPS Japan порталы Қазақстан Республикасының Сыртқы істер министрлігінің рұқсатымен дайындады.