Тоқаев жастар форумында: «Қолда бардың қадірін білу керек»

8 ақпанда президент Астанада өткен жастар форумында сөз сөйледі. Жиынға қатысушылар алдында сөйлеген сөзінде мемлекет басшысы жастардың бастамаларына қолдау білдіріп, олардың қамқорлығы, жасампаздығы және ел өміріне белсене араласқаны үшін алғыс айтты, деп хабарлайды Orda.kz.

Президент  Қазақстан тарихындағы қазіргі кезеңді бетбұрыс деп атады.

«Қазақстан ең озық мемлекетке айналуы тиіс. Біз тек үйреніп қана қоймай, өзгелер де үйренетін ел болуымыз керек. Барлық бастамаларды жүзеге асыру жастардың қолында», - деді Мемлекет басшысы. 

Тоқаевтың айтуынша, Қазақстан балалар мен жастарға мемлекет тарапынан жан-жақты қолдау көрсетілетін әлемдегі санаулы елдердің бірі.

• Екінші жыл Ұлттық қор кірісінің бір бөлігі балалардың есепшотына түсіп жатыр. Олар кәмелетке толған соң бұл ақшаны оқуға немесе баспана сатып алуға жұмсай алады.

• Бес жастан бастап балалар үшін «Келешек» бағдарламасы бар, ол ата-аналарға болашақ білім алу үшін ақша үнемдеуге көмектеседі.

• Бастауыш сынып оқушылары тегін тамақпен қамтамасыз етілген. Балалар мемлекет есебінен түрлі үйірмелер мен секцияларға бара алады.

• Мектеп түлектерінің грант бойынша университетке немесе колледжге түсуге мүмкіндігі бар. Соңғы жылдары гранттар саны айтарлықтай өсті.

• «Болашақ» бағдарламасы бойынша мыңдаған жастар шетелде білім алып жатыр.

«Бұл міндеттемелердің барлығын мемлекет өз мойнына алады. Бұндай қолдау әлемнің көп елінде жоқ. Қолда бардың қадірін білу керек», - деді президент. 

Жастар үшін тағы бір маңызды жоба – болашақ мемлекеттік басқарушыларды тартуға мүмкіндік беретін «Президенттік жастар кадрлық резерві» екені айтылды.

Сонымен қатар, саяси реформалар аясында Парламент Мәжілісі мен мәслихаттар сайлауында жастар үшін арнайы квоталар енгізілді.

Елімізде жас кәсіпкерлер мен жас отбасыларды қолдауға ерекше көңіл бөлінуде, оларға бизнесті дамыту және тұрғын үй сатып алу үшін жеңілдетілген несиелер берілуде.

Жастардың шығармашылық саласындағы табыстарының арқасында Қазақстан әлемге танылуда.

«Мемлекет шығармашылық индустрияны дамытуға бар күш-жігерін салады. Қазір әдебиет, музыка, кино, телехикаялар мен компьютерлік ойындар саласындағы жобаларға жүйелі қолдау көрсететін арнайы қор құрылып жатыр», - деді президент. 

Қазақстанда жұмысшы мамандықтарға ерекше көңіл бөлінетін болады.

«Биыл жұмысшы мамандықтары жылы болып жарияланды. Біз еңбек адамдарының қоғамдағы жағдайын жақсарту шараларын қолға алып жатырмыз. Ең басты міндет – еңбек мәдениетін қалыптастыру. Кез келген жұмыс жоғары бағаланады, жұмысшы мамандықтарын таңдаған жастарымыз ерекше құрметке лайық», - деді президент 

Сөзінің соңында мемлекет басшысы жастардың жігері мен бірлігінің арқасында Қазақстан алға қойған мақсаттарына жететініне сенім білдірді.