Тоқаев Үштөбедегі әкесінің есімі берілген мектепке барды

Президенттің Жетісу өңіріне жасаған сапары жалғасып жатыр. Ол бүгін Үштөбе қаласында орналасқан Кемел Тоқаев атындағы орта мектепке барды, деп хабарлайды Orda.kz.

Мектеп директоры Ләззат Испанова оқушылардың жетістіктері туралы айтып, жазушы мұражайымен таныстырды. 1997 жылы құрылған музейге қаламгердің тұтынған заттары, фотосуреттері, құжаттары мен кітаптары қойылған. 

Президентке жазушының өмірі мен шығармашылығына арналған зияткерлік ойын және повестерінің желісі бойынша шағын қойылым көрсетілді.

Мемлекет басшысына «Кемел Тоқаев атындағы қайырымдылық қоры» атқарған жұмыстары жөнінде баяндалды. Биыл Қордың құрылғанына 15 жыл толып отыр.