Тоқаев үкіметке жалпыға бірдей декларацияны тежей тұруды тапсырды

Қасым-Жомарт Тоқаев ауыл шаруашылығы қызметкерлері форумында алдағы жалпыға бірдей декларация туралы айтты, деп хабарлайды Orda.kz.

Президент бұған асығудың қажеті жоқ екенін ескертті. Оның ойынша цифрландырудың дамуы мен мемлекеттік деректер базасы интеграциясын ескерсек, дәстүрлі декларациялаудың қажет болмауы да мүмкін.

«Жалпыға бірдей табыс декларациясы тұжырымдамасы 14 жыл бұрын қабылданған. Осы уақыт ішінде ел цифрландыру және финтех салаларында айтарлықтай жетістіктерге жетті. Түрлі мемлекеттік органдардың деректер базасының интеграциясы қамтамасыз етілді. Қаржылық және салықтық бақылау күшейтілді. Осы ауқымды өзгерістерді ескере отырып, төртінші және соңғы кезеңге жататын азаматтардың декларация тапсыруының орындылығы туралы мәселе туындайды. Үкімет бұл мәселенің шешімін табуы керек», - деді президент. 

Еске салайық, 2024 жылдың 1 қаңтарынан бастап Қазақстанда екі миллионнан астам адам жалпыға бірдей декларациялаудың үшінші кезеңі аясында активтері мен міндеттемелері туралы декларацияны (250.00 нысаны) ұсынуға міндетті болатын. Тізімге заңды тұлғалардың және жеке кәсіпкерлердің басшылары, құрылтайшылары (қатысушылары), сондай-ақ олардың жұбайлары (зайыбы) кіреді.