Тоқаев Украина президенті Зеленскиймен кездесті

БҰҰ Бас Ассамблеясының 80-сессиясы аясында Нью-Йоркте Қазақстан мен Украина президенттерінің кездесуі өтті, деп хабарлайды Orda.kz.

Екі ел президенті экономикалық және гуманитарлық ынтымақтастық мәселелерін, сондай-ақ қазақстандық компаниялардың Украинаны қайта қалпына келтіру жұмыстарына қатысуға деген қызығушылығын талқылады. Владимир Зеленский еліндегі жағдай жөніндегі өз көзқарасын ортаға салды.

Қасым-Жомарт Тоқаев аса күрделі дағдарыс жағдайында қақтығысты тоқтатудың жолдарын іздеуде дипломатиялық жұмысты жалғастырудың маңыздылығын атап өтті.

Кейінірек Владимир Зеленский кездесу туралы кездесу жайлы былай деп жазды:

«Қазақстан Президенті Қасым-Жомарт Тоқаевпен кездестім. Қазіргі кезеңдегі басты міндет — сенімді қауіпсіздік кепілдіктерімен әділетті әрі берік бейбітшілікке қол жеткізу».

Зеленскийдің айтуынша, әңгіме барысында Украина, АҚШ, Еуропа және әлемнің өзге де серіктестерінің соғысты тоқтатуға бағытталған күш-жігері жан-жақты талқыланған.

«Украинаның егемендігі мен аумақтық тұтастығын қолдағаны үшін Қазақстанға алғыс айтамын», — деп қосты Зеленский. 

Еске сала кетсек, Астана қаласы Ресей, АҚШ және Украина президенттерінің кездесуіне дайын екені жайлы жазған едік.