Тоқаев төрт жаңа заңға қол қойды

Президент қол қойған заңдар қатарында ғылым, ғылымды қажет ететін аумақтар, әлеуметтік қамтамасыз ету, білім беру, денсаулық сақтау және әскери қызмет мәселелері бойынша заңнамалық актілерге өзгерістер мен толықтырулар енгізу туралы заң бар, деп хабарлайды Orda.kz.       

Сондай-ақ машина жасау мен көлік саласын дамытуға қатысты заңға да қол қойылды.

Тағы бір құжат атқарушылық іс жүргізуді жетілдіруге бағытталған.

Бұдан бөлек, Мемлекет басшысы цифрландыру, дербес деректерді қорғау, жол қозғалысы және көліктегі озық технологияларды реттеу мәселелері бойынша заңға қол қойды.

Қазақстан президенті қол қойған заңдарды атап өтсек:

• «Қазақстан Республикасының кейбір заңнамалық актілеріне ғылым, ғылымды қажетсінетін аумақтар, әлеуметтік қамтамасыз ету, білім беру, денсаулық сақтау және әскери қызмет мәселелері бойынша өзгерістер мен толықтырулар енгізу туралы».

Бұл заңда ғылымды қажетсінетін аумақтарды құру, ғылымды қаржыландыру тетіктерін жетілдіру, ғалымдардың мәртебесін арттыру, Ғылым академиясының рөлін күшейту және т.б. қарастырылған.

• «Қазақстан Республикасының кейбір заңнамалық актілеріне машина жасау мен көлікті дамыту мәселелері бойынша өзгерістер мен толықтырулар енгізу туралы».

Бұл құжат отандық машина жасаудың инвестициялық тартымдылығын арттыру, жаңа технологияларды енгізу, кәсіпорындардың экспорттық әлеуетін ұлғайту және өнімнің ішкі құнын өсіру шараларын қарастырады. Түзетулердің жекелеген бөлігі авиация саласына қатысты.

• «Қазақстан Республикасының кейбір заңнамалық актілеріне атқарушылық іс жүргізуді жетілдіру мәселелері бойынша өзгерістер мен толықтырулар енгізу туралы».

Мұнда азаматтардың құқықтары мен заңды мүдделерін қорғауды күшейту, жеке сот орындаушыларының қызметін бақылау және басқа да мәселелерге назар аударылған.

• «Қазақстан Республикасының кейбір заңнамалық актілеріне цифрландыру, дербес деректерді қорғау, жол қозғалысы және көлікте озық технологияларды реттеу мәселелері бойынша өзгерістер мен толықтырулар енгізу туралы».

Бұл заң көлік саласында озық технологияларды қолдану, авто мектептерді бақылау, сондай-ақ көлік және жол салаларын цифрландыру аясында азаматтардың дербес деректерін өңдеу мен қорғауды күшейту нормаларын қамтиды.

Заңдардың мәтіні баспасөзде толық жарияланады.

Оқи отырыңыз:

• Қазақстан мен Еуропалық одақ 12 миллиард долларлық келісім дайындап жатыр
• Тоқаев ЕО дөңгелек үстелінде: Біз білімге негізделген экономика қалыптастыруға ұмтыламыз
• Тоқаев: Бельгия — Қазақстанның Еуропалық Одақтағы басты серіктестерінің бірі