Тоқаев ТМД саммитінде: Қазақстан қазақ тілінің мәртебесін нығайта береді

Қазақстан алдағы уақытта да қазақ тілінің мәртебесін нығайта береді, деді Президент Қасым-Жомарт Тоқаев ТМД саммитінде.

«Саммитте мәдени-гуманитарлық ынтымақтастық мәселелеріне ерекше назар аударылды. Қазақстан басшысы ТМД елдерінің көпқырлы ынтымақтастығында орыс тілінің ерекше рөлін атап өтті» делінген жұма күні таратқан хабарламада.

Мемлекет басшысының айтуынша, «Биыл ТМД-да орыс тілі жылы болып жариялануының символдық мәні бар».

«Бүгін біз орыс тілі жөніндегі халықаралық ұйымның Құрылтай келісімі мен Жарғысына қол қою туралы тарихи шешім қабылдаймыз. Бұл ұйым дербес халықаралық құрылымға айналып, заңды тұлға болады. Жаңа ұйым барлық елдер үшін ашық және, әрине, жаһандық гуманитарлық ынтымақтастық тұрғысынан өте өзекті. Орыс тілін ТМД кеңістігінде және кеңірек халықаралық ауқымда ілгерілету бойынша қабылданған шаралар біздің елдеріміздің ұлттық бірегейлігін нығайту тенденциясын мүлде жоққа шығармайды. Қазақстан мемлекеттік қазақ тілінің мәртебесін нығайту саясатын жалғастырады», - деді Тоқаев.