Тоқаев су тасқыны туралы: Алдағы 10 күн ең қиын болады

Мемлекет басшысы Қасым-Жомарт Тоқаев Солтүстік Қазақстан облысының су басқан аумақтарын аралап шыққаннан кейін су тасқынынан эвакуацияланған тұрғындармен кездесті.

Президент азаматтармен сұхбатында мемлекет барлық қажетті шараларды қабылдайтынын айтты. Бүгінгі таңда су тасқынынан зардап шеккендердің барлығына біржолғы төлем жасалуда. Комиссияның бағалауынан кейін жергілікті халыққа мүлік шығыны өтеледі. Үйлері қалпына келтіруге келмейтін тұрғындар үшін жаңа баспана салынып, барлық қажетті инфрақұрылым қамтамасыз етіледі. Сонымен қатар оларға несие мен қарыздарын кейінге қалдыру қарастырылған.

Қасым-Жомарт Тоқаевтың айтуынша, тұрғындарға жан-жақты көмек көрсетіледі.

«Біз қазір қиын кезеңді бастан өткеріп жатырмыз, екінші жағынан, су бірте-бірте төмендейді, бірақ қазір бізде бүкіл елді қалпына келтіру және осы апаттың салдарын жою үшін жоғарыда айтқанымдай, біз осы су тасқыны салдарынан болған барлық шығынды өтейміз , әрбір отбасы мемлекет тарапынан қамқорлыққа алынатын болады, бұл енді мен үшін басымдық»,-  деді президент.

Бұған дейін Тоқаевтың Солтүстік Қазақстан облысына келгені хабарланған болатын. Мемлекет басшысының жұмыс сапары Қызылжар ауданы, Петропавл қаласының іргесін қарау, сондай-ақ Сергеев су қоймасының үстінен ұшудан басталды.