Тоқаев "Самұрық-Қазына" басшысын қабылдады

Қасым-Жомарт Тоқаев "Самұрық-Қазына" АҚ Басқарма Төрағасы Нұрлан Жақыповты қабылдады, деп хабарлайды Ақорда.

Нұрлан Жақыпов Қор қызметінің 2024 жылдың бірінші жартыжылдығындағы негізгі нәтижелерін және алдағы кезеңге арналған жоспарларын ұсынды.

"Қор тікелей шетелдік инвестициялардың катализаторы ретінде әрекет етеді және шетелдік серіктестермен бірлесіп мұнай – газ химиясы, энергетика, көлік және логистика, машина жасау, цифрландыру жобаларына бірлесіп инвестициялайды" деп хабарлады Ақорда.

"Самұрық-Қазына" тобының инвестициялық портфелі 53,5 трлн теңгеге 130-дан астам жобаны қамтиды. Мұнай-газ, мұнай-химия, энергетика, логистикалық салаларда және тау-кен өнеркәсібінде мегажобаларды іске асыру тұтастай алғанда ел экономикасына мультипликативтік әсер береді деп күтілуде.

Қор басшысы Корпоративтік әлеуметтік жауапкершілік аясындағы Қордың қайырымдылық жобалары туралы айтып берді. Жыл соңына дейін елімізде 40 оңалту орталығын ашу жоспарлануда.

Президент инвестициялық және әлеуметтік жобаларды іске асыру, сондай-ақ қор жұмысын одан әрі жетілдіру бойынша бірқатар нақты міндеттерді белгіледі.