Тоқаев Руанда Президентінің арнайы өкілін қабылдады

Руанда Президентінің арнайы өкілі Жан Поль Нюрубутаманы Қасым-Жомарт Тоқаев қабылдады, деп хабарлады Orda.kz.

Арнайы өкілді қарсы алған Президент Қасым-Жомарт Тоқаев Руанда Президенті Пол Кагамеге ізгі тілегін жеткізді. Ол Руанда тарапына Қазақстанмен көпқырлы ынтымақтастық құруға деген ниетті үшін алғыс білдірді.

Қасым-Жомарт Тоқаев Африка елдерімен өзара іс-қимылдың оң динамикасын қанағаттанушылықпен атап өтіп, екіжақты және көпжақты күн тәртібіндегі мәселелердің ауқымы бойынша Руандамен қарым-қатынасты одан әрі нығайтудың маңыздылығын атап өтті.

Осы тұрғыда президент жақында Қазақстан мен Руанда арасындағы дипломатиялық және қызметтік төлқұжаты бар азаматтарды  визалық талаптардан босату туралы келісімге қол қойылғанын жоғары бағалады.

Жан Поль Нюрубутама Қазақстанның саяси және әлеуметтік-экономикалық салалардағы елеулі табыстарын атап өтіп, Тоқаевқа қабылдағаны үшін алғыс айтты.

Әңгіме барысында сауда-экономикалық және мәдени-гуманитарлық ынтымақтастықтың перспективалық бағыттары да талқыланды.