Тоқаев Путинмен екі елдің шекаралас аймақтарындағы су тасқыны жағдайын талқылады

Қазақстан президенті Қасым-Жомарт Тоқаев Ресей басшысы Владимир Путинмен екі елдің шекаралас аймақтарындағы су тасқыны жағдайын талқылады.

Бұл туралы Кремльдің баспасөз қызметі хабарлады.

«Владимир Путин Қазақстан Президенті Қасым-Жомарт Тоқаевпен телефон арқылы сөйлесті. Ресей мен Қазақстанның шекаралас облыстарындағы күрделі су тасқыны жағдайы жан-жақты талқыланды. Жағдайды бірлесіп бақылайтын және болжайтын, келісілген ден қою шараларын әзірлейтін және жүзеге асыратын екі елдің тиісті ведомстволары мен қызметтері арасында тығыз өзара іс-қимыл болды. Мемлекет басшылары бұл жұмысты жандандыру бойынша тапсырмалар беруге келісті» делінген хабарламада.

Сондай-ақ халықаралық және өңірлік мәселелердің кейбір аспектілері, соның ішінде Ресейдің Тәуелсіз Мемлекеттер Достастығындағы және Қазақстанның Ұжымдық қауіпсіздік шарты ұйымындағы төрағалығы контекстіндегі мәселелер қозғалды.

«Ресей-қазақстандық одақтастық қарым-қатынастарды одан әрі жан-жақты нығайтуға өзара бейілділік расталды» деп қосты Кремль.