Тоқаев: Өздерін блогер санап әкімдердің әр қадамын аңдуда

Қасым-Жомарт Тоқаев барлық деңгейдегі мәслихаттардың екінші республикалық форумында әкімдердің әр қадамын аңдуды әдетке айналдырған блогерлер туралы сөз қозғады, деп хабарлайды Orda.kz.

Президенттің айтуынша,  әкімдер халықпен ашық қарым-қатынас орнатып, сындарлы пікір алмасуға дайын болуы керек. Алайда, халықты дүрліктіріп, заңсыз әрекеттерге жол берілмеуі тиіс. Заң бәріне ортақ және одан ешкім асып кетпеуі керек. Мемлекеттің мүддесі жеке популистік қызығушылықтардан жоғары болуы қажет. Қоғамның сыны мен жауапкершіліктен қашпай, батыл шешім қабылдауға дайын болу маңызды.

«Қоғамның әкімдерге қоятын талабы қашанда жоғары. Бұл – заңды құбылыс. Әкімнің жұмысына сын көзбен қарау – демократиялық қоғамға тән қалыпты нәрсе. Бірақ сынағанның жөні осы екен деп, тым артық кететін әсіре белсенділер де бар. Өзін блогер санайтын кейбір адамдар әкімнің әр қадамын аңдуды әдетке айналдырды. Жұмысқа кедергі жасап, тіпті, қоқан-лоқы көрсететіндер бар. Әрине, ауыл, аудан немесе қала тұрғындары болсын, барлығы жайлы өмір сүргісі келеді. Азаматтарға барынша қолайлы жағдай жасау – әкімге де, жергілікті мәслихаттарға да ортақ міндет», - деді Тоқаев.