Тоқаев олимпиадашылармен кездесуін кейінге қалдырды

Қазақстан Президенті Қасым-Жомарт Тоқаевтың олимпиада ойындарының жүлдегерлері мен олардың жаттықтырушыларымен жоспарланған 15 тамыздағы кездесуі бірнеше спортшының коронавирус жұқтыруына байланысты кейінге қалдырылды. 

Бұл туралы президенттің баспасөз хатшысы Берік Уәли мәлімдеді.

Оның айтуынша, президент атлеттерді олардың ерекше жетістіктері үшін марапаттап үлгерді. Алайда, қазіргі жағдайды ескере отырып, жеке кездесу тамыз айының соңына ауыстырылды.

 «Қасым-Жомарт Кемелұлы Ұлттық құрама мүшелерімен бүгін кездесуді жоспарлаған болатын. Өкінішке қарай, атлеттер мен жаттықтырушылардың жартысынан коронавирус инфекциясы анықталды. Сол себепті кездесу кейінге шегерілді. Спортшылар мен бапкерлердің тезірек сауығып кетуіне тілектеспіз», — деп атап өтті Уәли.