Тоқаев Назарбаевтың әріптестерін марапаттады

Қазақстан президенті Қасым-Жомарт Тоқаев металлургтерді марапаттау туралы жарлыққа қол қойды.

Бұл туралы Ақорда хабарлады.

Металлургтер күні қарсаңында отандық металлургия мен өнеркәсіпті дамытуға қосқан үлесі үшін бір топ жұмысшы мемлекеттік наградалармен марапатталды.

«Құрмет» орденімен 22 адам, 3-дәрежелі «Еңбек даңқы» орденімен 41 адам, «Ерен еңбегі үшін» медалімен 51 адам марапатталды. Сондай-ақ, 7 маман президенттің Құрмет грамотасымен марапатталды.

Қазақстанда металлургтер күні 2003 жылдан бері шілде айының әрбір үшінші жексенбісінде тойланады.

Еске салсақ, экс-президент Нұрсұлтан Назарбаев мамандығы бойынша – металлург. Ол Украинадағы Днепродзержинск қаласындағы Днепр металлургиялық комбинатының жанындағы № 8 кәсіптік-техникалық училищеде оқып, 1960 жылы бітірді. Сол жылы Теміртау қаласындағы «Казметаллургстрой» тресінің құрылыс басқармасына жұмысшы болып орналасады. Одан кейін Қарағанды ​​металлургия комбинатында (қәзіргі «Qarmet») шойыншы, пеш машинисті, диспетчер, газ операторы және домна цехының аға газ операторы болып жұмыс істеді.