Тоқаев Мирзоянмен кездесті

Мемлекет басшысы Қасым-Жомарт Тоқаев Арменияның сыртқы істер министрі Арарат Мирзоянмен кездесті, деп хабарлайды Orda.kz.

Президент екі ел көшбасшыларының өткен жылы Қазақстан мен Арменияға жасаған сапарлары өзара қарым-қатынасты нығайтуға серпін бергенін атап өтті.

«Сіздің Астанаға алғашқы ресми сапарыңыз екі ел арасындағы ынтымақтастықты одан әрі нығайту тұрғысынан маңызды. Қазақстан халқы армян халқына және сіздің мемлекетке ерекше құрметпен қарайды», — деді Тоқаев.

Мемлекет басшысы Қазақстанның Бейбітшілік туралы келісім жобасы бойынша келіссөздердің аяқталуын және Ереван мен Баку арасындағы мемлекетаралық қатынастардың жандануын қолдайтынын жеткізді. Бұл маңызды қадам Орталық Азия елдерімен ынтымақтастықты дамытуға және аймақтағы қауіпсіздікті нығайтуға ықпал етеді деп сенім білдірді.

Арменияның сыртқы істер министрі жылы қабылдағаны үшін алғыс айтты.

«Біз екі ел арасындағы ынтымақтастықты дамытуға қатысты сіздің ұстанымыңызды қолдаймыз», — деді Арарат Мирзоян.

Кездесу барысында сауда-экономикалық, инвестициялық, көлік-логистикалық және мәдени-гуманитарлық салалардағы әріптестікті дамыту мәселелері қарастырылды.

Тоқаев қазақстандық бизнес өкілдерінің Арменияға тауар тасымалын 350 миллион долларға дейін ұлғайтуға дайын екенін мәлімдеді.