Тоқаев Қытай басшысын әуежайдан өзі қарсы алды

Қасым-Жомарт Тоқаев Қытай Халық Республикасының төрағасы Си Цзиньпинді Астанадағы халықаралық әуежайдан өзі қарсы алды. Қытай басшысы Қазақстанда үш күн болады және Астанада өтетін «Қытай – Орталық Азия» саммитіне қатысады, деп хабарлайды Orda.kz.

Ауқымды халықаралық шараға байланысты қала көшелерінде қозғалысқа уақытша шектеулер енгізіледі.

Си Цзиньпиннің бұл сапары туралы бұған дейін бірнеше рет ресми ақпарат тараған. Ақорда үшін бұл — ерекше мәні бар дипломатиялық оқиға. Тоқаев Қытай көшбасшысының сапарын наурыз айында-ақ Қытай Коммунистік партиясы Орталық комитетінің халықаралық байланыстар бөлімінің жетекшісімен талқылаған.

Қытай тарапы екі ел арасындағы қарым-қатынасты сипаттағанда жиі «мәңгілік стратегиялық әріптестік» терминін қолданады.

Айта кетейік, Қазақстан президентінің баспасөз қызметі жақында Қытай көшбасшысының ұшағына елдің Әуе қорғанысы күштерінің жойғыш ұшақтары қалай ілесіп жүргенін көрсеткен болатын.