Тоқаев қылмыстық жолмен алынған кірістерді заңдастыру мен терроризмді қаржыландыруға қарсы заңға қол қойды

Қасым-Жомарт Тоқаев қылмыстық жолмен алынған кірістерді заңдастыруға, терроризмді және жаппай қырып-жою қаруын таратуды қаржыландыруға қарсы іс-қимыл мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы Заңға қол қойды, деп хабарлайды Orda.kz.

Жаңа заң жеке деректермен және ірі көлемдегі қаржы ағындарымен жұмыс істейтін ұйымдарға қойылатын талаптарды күшейтеді. Цифрлық активтермен, мәдени құндылықтармен жасалатын операциялар мен коммерциялық емес ұйымдардың қызметі қатаң бақылауға алынбақ.

Құжатта қаржы ұйымдарының басшыларын мұқият тексеруге және олардың ақшаны жылыстату схемаларына қатысуының алдын алуға ерекше назар аударылған. Мұндай қылмыстар үшін сотталған бенефициарлары бар компанияларға қойылатын талаптар да күшейтіледі.

Мемлекеттік органдар өз құзыреттері шегінде қауіп-қатерлерді тұрақты түрде бағалап, бақылауындағы ұйымдарға қатысты қадағалауды күшейтуге міндеттеледі. Сонымен қатар, құжатта цифрлық қауіпсіздікті арттыру және күмәнді операцияларды мониторингілеу шаралары да қарастырылған.