Тоқaев көлеңкелі экономикамен күресетін үш агенттіктің өкілеттігін кеңейтті

Қасым-Жомарт Тоқаев ақшаны заңсыз жолмен жылыстатуға, терроризмді қаржыландыруға және жаппай қырып-жою қаруын таратуды болдырмауға қатысты мемлекеттік бақылауды күшейтетін жарлықтарға қол қойды, деп хабарлайды Orda.kz.

 Жаңа талаптар бірден үш ведомствоға қатысты: Қаржылық мониторинг агенттігіне (ҚМА), Қаржы нарығын реттеу және дамыту агенттігіне (ҚНРДА) және Бәсекелестікті қорғау және дамыту агенттігіне (БҚДА).

Ең ауқымды өкілеттіктер ҚМА-ға берілді. Агенттік күмәнді операциялар туралы мәліметтерді тікелей құқық қорғау және арнаулы органдарға жолдай алады, сондай-ақ бұл жөнінде Бас прокуратураны хабардар етеді. Сонымен қатар, ведомствоға жария лауазымды тұлғалардың, олардың жұбайлары мен жақын туыстарының тізімін жүргізу міндеті жүктелді.

ҚМА-ның міндеттеріне көлеңкелі экономикамен күрес, қаржылық қылмыстар саласындағы тәуекелдерді бағалауды үйлестіру және қаржылық мониторингке қатысушылардың заңнаманы сақтауын бақылау да кірді. Агенттік клиенттер мен бенефициарларды тексеру тәртібін айқындауға, терроризмді қаржыландырумен байланысты тұлғаларды тізімнен шығару туралы шешімдерге қатысуға және күмәнді белсенділік жөніндегі деректерді беру қағидаларын белгілеуге құқылы болды.

ҚНРДА енді экспорттық-кредиттік агенттіктің, шетелдік банктер мен сақтандыру компаниялары филиалдарының, резидент емес сақтандыру брокерлерінің және ұлттық пошта операторының ақшаны жылыстатуға қарсы заңнаманы орындауын бақылауды жүзеге асырады.

Ал БҚДА биржалардың, брокерлер мен клирингтік орталықтардың терроризмді қаржыландыруға қарсы талаптарды қалай сақтайтынын қадағалайды. Сондай-ақ агенттік бұл ұйымдар үшін ҚМА-мен келісу арқылы ішкі бақылау қағидаларын бекітеді.

Барлық жарлықтар күшіне енді.

Бұған дейін Тоқаев Қаржылық мониторинг агенттігінде кеңес өткізіп, ведомствоға цифрлық құралдар мен жасанды интеллектті белсендірек пайдалануды тапсырған болатын. Мемлекет басшысы қылмыскерлердің заманауи технологияларды, соның ішінде ЖИ-ді жиі қолдана бастағанын  атап өтті. Егер құқық қорғау органдары алдын ала әрекет етпесе, бұл ұлттық қауіпсіздікке төнетін қатерге айналуы мүмкін екенін ескертті.

Еске салсақ, Қасым-Жомарт Тоқаев Қызылордада өтіп жатқан Ұлттық құрылтайдың V отырысында үкіметтің экономиканың бірқатар салаларындағы жұмысы туралы сыни пікір айтқан болатын. 

Үкімет логистика мәселелерін талқылау барысында айтарлықтай сынға ұшырады. Мемлекет басшысы атап өткендей, жаһандық логистика картасында лайықты орын алу үшін жүйелі күш-жігер мен нақты іс-қимыл стратегиясы қажет. Үкімет алдына бұған дейін де авиацияда, атап айтқанда, жүк саласында нақты нәтижелерге қол жеткізу міндеті қойылған еді.

Оқи отырыңыз: 

• Мемлекеттік кеңесші лауазымы жойылады, екі ай ішінде президент сайлауы өткізіледі
• Елімізде жаңа билік органы — Халықтық кеңес құрылды
• Тоқаев Құрылтай төрінде Самұрық-Қазына қорына сын айтты