Тоқаев: Қаңтар оқиғасы – ел бірлігі мен әділдік үшін үлкен сабақ

Президент Қасым-Жомарт Тоқаев  «Ана тілі» газетіне берген сұхбатында Қаңтар оқиғасы туралы сөз қозғады. Ол бұл оқиғаны Қазақстан тарихындағы ең ауыр сынақтардың бірі деп бағалап, ел бірлігін нығайту мен әділдік орнату қажеттігін атап өтті, деп хабарлайды Orda.kz.

Қасіретті оқиғадан кейін қоғамда түрлі пікірлер айтылып, ақпараттық кеңістікте жалған мәліметтер тарағаны белгілі. Президент бұл жағдайға байланысты халықтың көкейінде күмән қалмау үшін биліктің ашықтық қағидатын ұстанғанын жеткізді.

«Қаңтар қасіреті әлеуметтік әділетсіздіктің және кейбір топтардың мемлекет тағдырына немқұрайлы қарауының нәтижесі. Бірақ біз бұл оқиғадан үлкен сабақ алдық. Біздің міндетіміз – ел бірлігін сақтау және әділдік орнату», – деді мемлекет басшысы.

Сонымен қатар, Тоқаев Қаңтар оқиғасына қатысты барлық тергеулердің ашық жүргізілгенін және Парламентте арнайы тыңдаулар ұйымдастырылғанын айтты.

 «Тергеу нәтижелері ел алдына жария етілді. Билік халықтың көкейінде ешқандай күмән қалмауы үшін саналы түрде ашықтық қағидатын ұстанды. Қылмыскерлер әділ жазасын алды, бұл – біздің ел үшін әділеттіліктің басымдығының дәлелі», – деп мәлімдеді президент.